O Concello de Santiago e Área Central asinaron esta semana un convenio de colaboración para o desenvolvemento de actividades de dinamización comercial deste 2022, entre elas as de Nadal.
O convenio ten por obxecto o desenvolvemento dun programa de dinamización comercial dirixido ao barrio de Fontiñas, en particular, e a toda a cidade, en xeral, durante este ano 2022.
A achega municipal, por un valor de 35.000 euros, permitirá financiar un conxunto de iniciativas postas en marcha polo centro comercial ao longo do 2022. Entre as actidades desenvolvidas destaca a animación de Reis Magos, o servizo de ludoteca “Ludoarte”, a Feira de minerais, o servizo de empaquetado de agasallos para o Nadal, a campaña “Os teus cartos valen mais”, a Feira do Disco ou os eventos realizados arredor de festividades como o Día da nai e o Día do pai, o San Valentín ou o Entroido. A subvención tamén permitirá sufragar os vales de aparcadoiro para os clientes que se acheguen a realizar as súas compras.
