Tras o descanso do verán, este sábado iniciamos a tempada de actividades en Área Central, xa que haberá: o “IV Torneo de xadrez Cidade de Santiago”, unha nova sesión da ludoteca gratuíta “Ludoarte” e a actividade de pago “Ven brincar” na praza de Europa, coa instalación de varios inchables, un deles de 70 m. de longo.

Desde as once da mañá, a esquina amarela de Área Central será a sede do “IV Torneo de xadrez Cidade de Santiago”, unha competición organizada pola Escola de Xadrez Compostela e na que asistirán uns 150 participantes das categorías sub 8, sub 10, sub 12, sub 14 e absoluto.

Por outra banda, desde as 16.30 ata as 20.30 horas, a praza de Europa acollerá a actividade de pago “Ven brincar!”, unha oportunidade para os máis pequenos para que pasen unha tarde divertida mentres gozan dunha espectacular xincana de inchables de 70 m. de longo e tres inchables máis. Para gozar destes xogos, hai que abonar unha entrada de 6 euros que da acceso a subir todas as veces que se queira nas catro horas de duración da actividade.

E como sempre buscamos o mellor para as familias, será posible conseguir a entrada a metade de prezo para as persoas que poidan demostrar que fixeron un gasto superior a 20 euros no pequeno comercio de Área Central entre este xoves e o mesmo sábado.

Por último, este sábado, de 18.00 a 20.00 horas na esquina azul de Área Central, volve o servizo gratuíto de Ludoteca baixo o nome de “Ludoarte” con novidades:

• Para nenos de 0 a 3 anos retomamos o seu espazo no que entreterse en familia con varios xogos.
• Para maiores de 3 anos contamos con outro espazo con xogos renovados e obradoiros creativos. Así, os pais destes nenos dispoñen dunha hora para realizar as súas compras ou tomar algo nos establecementos de Área Central mentres os seus fillos desfrutan e aprenden. Para participar no apartado dos obradoiros, é aconsellable reservar praza aquí.

Este sábado 17 de setembro, aquí te esperamos!