Dende mediados de xaneiro e ata o 15 de abril, a exposición “Galicia monumental” estará presente en Área Central. Unha mostra de réplicas de monumentos para achegar aos visitantes o noso patrimonio arquitectónico. Está composta por castelos, faros e igrexas das catro provincias galegas. A exposición está organizada pola Asociación EXIN Castillos y West e conta co apoio da Xunta de Galicia.

As maquetas foron feitas con pezas dun xogo de construción que fascinará aos pequenos e espertará os recordos e a nostalxia dos maiores de 40 anos. Trátase dun conxunto de pezas dun xoguete de construción dos anos 70- 80 que volve á vida baixo o nome de NG Castillos, a empresa que actualmente reedita as pezas.

Ademais desta incrible réplica de monumentos, a exposición supón unha experiencia interactiva e lúdica. Existen uns paneis didácticos que invitan ao visitante a recorrelas mentres buscan elementos singulares do monumento. Tamén se poderá desfrutar de modelos orixinais do xoguete, varios castelos fantasía e tamén de novos modelos. Se aínda tes algunha destas pezas na túa casa, non te esquezas de traela. A organización tamén anima aos visitantes a expoñer as súas pezas no noso espazo!

Nesta exposición empregáronse máis de 150.000 pezas. Delas, 30.000 foron usadas para a fachada da Catedral de Santiago. A maqueta do Torre de Hércules, o pazo de Meirás ou o Castelo de Moeche forman parte desta vintena de réplicas. Sen dúbida, trátase dun traballo feito con moito agarimo e que, despois de seis meses ou un ano, ven a luz en Área Central.

Non te esquezas, ata o mes de abril podes visitar “Galicia monumental” en Área Central na nosa esquina amarela. Agardámoste!